我較罕得讀散文，讀了 〈我隨意，你盡量〉，我煞發現一件真趣味的代誌：過去我認為是欠點的，佇台文散文變做優點。
重描寫、求優美，冊皮若是按呢紹介，這款冊我定定看袂慣勢。〈我隨意，你盡量〉寫山水、花草，攏蓋頂真咧滾邊寫形體，我煞愈看愈要意。若欲講原因，應該就是「語言」。
文的語言庫
講起來，華語散文欲寫一項物件，較欠語言庫。大部分台灣的人對義務教育學華語，除了以文入語，所用的語言嘛猶未（猶咧？）在地化，無像台語有一寡專門講淡水地理、水文的語詞。借用「文的傳統」來寫的美文有伊的限制，大部分台灣人是仝一套古文晟養大漢的，欲變有新báng，讀者閣看有，就愛誠費氣。最近咧讀〈中國在梁庄〉，作者的母語是河南話，是官話的方言。伊寫文章的語言就蓋活氣，加足濟台灣華語無看過的動詞、形容詞，嘛有真濟在地的僻話。
講倒轉來，〈我隨意，你盡量〉是一本誠有語言自覺的冊。欲寫一項物件，昭華老師攏會用上準的詞。有的人寫台文，為著展現所學，會共俗語一改反反出來，看起來顛倒舊套。昭華老師定定會翻頭過來想，遮的語詞到底有合軀曷無。〈我隨意，你盡量〉用正板的台文，毋過袂硬欲為著媠，大力來寫媠文。譬如講〈圓仔花佮雞髻花〉的這段：
「花心吐出來的彼粒珠，略仔三角型，淡薄仔黏滑滑的青米色，佇猶未滒著花粉的時，會想著煠欲熟欲撋圓仔的粿酺」
閣有這段：
「菊仔花秋天尾才會開，一年的雨水落甲貼矣，天洗甲清氣湛湛，空櫳，秋凊，特別寂寞。」
台語的節奏感
以前讀過〈解破台語〉，和〈我隨意，你盡量〉相佮，才去領受著台語文特有的節奏。日文文學捷捷會予人牽連做伙、綿長的感覺。若按呢，台文適合啥款感覺？
台語的主題講了會稍停睏，像第一句講的「彼粒珠」，會予字句較短。台語愛用重疊字來形容，像黏滑滑，會有重複感。台語閣有「聽講..」、「看覓…」這寡標句詞。看頭前兩段例，就會當發現，台語字句長短交摻，一下仔緊一下仔慢。
台語除了正經寫，嘛會當𨑨迌仔寫，〈我隨意，你盡量〉有真濟好𨑨迌的所在。像上淡水往事追憶，講著西仔反這段：
「感應著會起雞母皮，袂輸林投姐來顯靈矣 — 殼仔弦仝款咧奏，聲有較薄板小可，就無一位歹命的椰姐欲出來訴冤的氣氛。」
椰子、椰姐仝音，是台語特有的。讀著的時誠愛笑，特別畫一个XD佇邊仔。
有台語這个語言庫，加上昭華對下淡水到上淡水，四界行踏。所致，寫出來的文佮生活誠密，是自然媠，讀的時學著誠濟。
