Âng Tiōng-Ong，昭和三年（1928年）十二月二日，佇岡山郡路竹庄的路竹大字出世，伊的家族自鄭成功時代就徛佇此地號做蔡文庄的庄頭。
伊是洪昆定佮蔡氏順珠的第一个囡仔。蔡氏順珠對一甲來，當地目前猶有一間蔡姓古厝。佇戶口簿仔頂頭，洪昆定做「田畑作」，毋過論真來講，伊是咧做kám仔店生理。洪昆定佮蔡氏順珠生六个查埔囝、三个查某囝。Âng Tiōng-Ong和上細漢的小弟精差24歲，伊做大兄，嘛若像咧做老爸，真少年就愛扞頭。
Âng Tiōng-Ong佇大社公學校接受義務教育，日本字是伊上慣勢的書面文字。食老的時，伊猶是會用這个階段所學的物件，講予怹孫仔聽，譬如講「男は度胸、女は愛嬌」、「咱做人愛真面目(まじめ）」。公學校出業了後，伊續落來投入競爭的考試，雖罔講無上取伊的第一志願台南第二中學，嘛考牢長榮中學校。
佇遐，Âng Tiōng-Ong綴傳教士學習英文、哲學。不而過佇Âng Tiōng-Ong讀冊的時，校長已經對牧師換做日本人，無讀偌濟聖經。彼時，Âng Tiōng-Ong成做是一个身懸百八的將才矣。這使伊感覺真龜怪，某一个孫仔是毋是有生長發育的問題。少年的Âng Tiōng-Ong佇長榮中學校學會曉泅水、跤球，培養出運動習慣。這項習慣，毋但予伊有健康的晚年生活，嘛予伊佇欲卒業前的一改意外當中活落來。
Âng Tiōng-Ong大部分蹛佇學寮，歇假有時仔坐回車轉去路竹。佇一擺四常的通勤時，伊雄雄聽著空襲警報，續落來是hue-lîng-ki的onn-onn叫的聲。伊發覺毋著，佇火車欲停靠大湖車頭進前，趕緊跳出去車廂，覕去路邊的塗稜。不過，一片碎去的炸彈對伊倒跤跤肚鑽過。伊忍牢咧，等這陣空襲結束，才閣坐車轉去路竹包紮。這个空喙佇伊的跤肚留落來，變做一个會用得囥一粒塗豆的塌窟仔。真濟冬以後，伊會展這个塌窟仔予伊細漢孫仔看。怹孫仔毋相信，伸手指頭仔入去，真正會凹落去。彼就是相連紲的岡山大空襲的其中一擺。可能是幾隻B29飛偏去到路竹、大湖，所造成的意外。嘛無的確，轟炸沿線車頭是怹的任務。
中學出業了後，伊到高雄地方法院岡山出張所，開始伊第一份頭路。出張所予民眾叫做登記所，辦理土地登記、分割等等的業務。到職無偌久，Âng Tiōng-Ong升起來做課長，彼冬伊19歲。閣一站，伊調去做路竹做主任。這段少年得志，佇伊定定講起的往事內底，排第一位。
若序細刁故意共伊當做成功學大師，弄伊歡喜的時，伊會講，這是「天時地利」。
啥物是天時？戰爭結束，日本人離開，國民黨來到台灣這塊島上。出張所改組，人事變動。Âng Tiōng-Ong講起伊讀紅樓夢，拚勢學這个新的國語。這種學國語的方式，竟然佮葉石濤仝款。1945年若準是有當銷冊排行榜，紅樓夢可能毋是第一就是第二。
佇事業發展順利彼同時，Âng Tiōng-Ong湖街林家的千金Tshuì-Liân娶入門。雖然湖街佇一改鼠病了後，人口減少去予降做「庄」，毋過林家是地方俗語話內底講著的大族，Âng Tiōng-Ong的家族比袂起。Lîm Tshuì-Liân和Âng Tiōng-Ong怹媽媽仝一冬懷胎，就按呢，Âng Tiōng-Ong siāng-sî有大漢查某囝佮小弟。價聲直直起，洪家不得已將這个小弟送去予人飼。
續來的代誌就無啥清楚。怹敢知影台北放送頭的消息？敢聽人講府城有律師予兵仔銃殺？敢知高雄車頭的的代誌？咱是掠無頭摠。干焦知影，Âng Tiōng-Ong後來離開公家機關，去外口開代書店。
這間代書店生理真好。戰後土地政策改動，濟濟人需要登記。怹生兩个後生，四个查某囝，佇彼個物質欠缺的年代，囡仔攏無啥枵著。Âng Tiōng-Ong 予 Lîm Tshuì-Liân 過了袂䆀，毋過嘛是有較艱苦的時陣。尤其是屘囝著病的時，重熱袂退，閣去穢著第三查某囝。病後，屘囝著較荏身，佇學校定定受人創治。無閒家計的Lîm Tshuì-Liân，請屘囝一个面色枵燥的同學，轉來厝內做伙用餐。就按呢，屘囝交著一个一世人的朋友，學校的生活嘛就較順利矣。
彼時，Âng Tiōng-Ong的小弟攏出外拍拚，一个一个離開路竹這个田庄。較倚近的，去台南、高雄，較遠的，去到台北，甚至有人去美國。可能是因為做一个長男，伊認爲家己有責任愛留踮遐。
Âng Tiōng-Ong非常真愛伊的工課，生活固定。伊逐工仝一時間起床，仝一時間食早頓，仝一時間到代書店，又閣仝一時間轉來厝lìn。伊的文件總是對半楔，疊甲齊齊。伊的通訊簿仔抄了誠齊嶄，若欲拆開批囊仔，伊會用小刀劃開封口的尻脊，四四正正，拆過的批囊囥佇桌頂，若像無拆，厝內的人不時舞毋著。佇遮，咱閣確定伊的生日一擺，確實是十二月相射手座，毋是處女座。
細項代誌伊是誠斟酌，大項代誌伊是有膽量。伊起厝做魚塭，佮人投資過磚仔窯、鋼鐵、遊艇廠。參像基金廣告講的，投資有一定風險有趁有賠應該共公開說明書看予詳細，磚仔窯就予紅毛土拍敗倒蝕停業。這寡事業內底，少數成功嘛是Âng Tiōng-Ong上佮意的，是goo-lú-huh球場。伊按算這項運動會綴經濟起飆時行起來，佮人合資買山坪，邀請日本的造園家設計。日後，伊較無插手經營，煞佮日本團隊維持聯絡。一直到伊目睭無好，才無咧寫新正賀卡和日本朋友相寄。
空課伊是誠gâu做，毋過欲按怎做一个阿爸，Âng Tiōng-Ong就無遐有把握。囝兒序細冊愈讀，性地愈無相成。伊煩惱後生無家業，煩惱查某囝嫁無翁，煞毋知影，有一寡物件無是骨力就揣有的。囝兒拄著股市輸錢、工廠倒擔，是伊上大的挑戰。Âng Tiōng-Ong定定愛佇家族感情佮理智之間做選擇，煞變做愈來愈難解。
這段時間，Âng Tiōng-Ong心內操勞，外表看起來煞是平靜。民國八十九年某一日，Âng Tiōng-Ong下班了後喙笑目笑，連伊的孫仔嘛看會出來。這工算是伊人生中上得意的一日，昭和おとこ Âng Tiōng-Ong見著大正おとこ，李登輝到goo-lú-huh球場食飯。Âng Tiōng-Ong事先無共厝內的人講，直接共相片洗出來，掛佇客廳正中央。
#人是當時開始算晚歲 #有孫子了後 #退休了後 #或者是無敢弄險了後？
對Âng Tiōng-Ong來講，晚歲是對Lîm Tshuì-Liân倒佇病床頂開始算的。照風俗，夫妻袂用得相送，伊佇厝內坐幾若工，看眾人出出入入咧無閒。了後，就袂閣有人搝伊去灶咖，用日語講細聲話；袂閣有人叫伊「ロン」。佇厝內，Âng Tiōng-Ong變做一个人的昭和時代。序細毋清楚為啥物阿媽叫阿公ロン，若是拍日本麻雀，應該會予人當做是榮合對椅頭仔跳起來！
Lîm Tshuì-Liân過身了後，原本照顧Lîm Tshuì-Liân的移工佇厝內加留一段時間，大大細細的家務事才袂亂去。妥當了後，伊共代書店放予大漢後生做，毋過猶是會上班半工。賰落來的半工，伊顧電視、去公園做運動、用鞋廚做半身的覆地thénn身。其他時間，伊協助屘囝做魚塭買賣的生理。若講著算數、競爭、交陪，伊是愈來愈siān。
留踮遐的Âng Tiōng-Ong，檢采是無到外地的兄弟遐自由快活，毋過伊佮意家己的生活。伊新聞看中視，戲劇看民視，愛聽的歌是〈昴〉。只要伊坐起去車頂，逐家就會共電台轉好勢。電影《橫山家之味》內的先生，表面上愛聽古典樂，佇kha-lá OK 煞唱〈昴〉。先生予人thuh-tshàu講愛演歌，伊有淡薄受氣應喙，〈昴〉才毋是演歌咧！這句話若對Âng Tiōng-Ong的喙講出來，一點仔也袂相扴。
這款閱聽偏好佮伊一世人比起來，只會當算「小case」。某一个暗頭，伊佮孫仔做伙坐佇藤椅的時陣，伊雄雄越頭：「我前半世人是日本仔，過來做中國人，這馬算台灣人。」
過了戶橂，伊攏愛穿一su siat-tsuh，三個月一擺到病院回診是按呢。不過，自尊心嘛有無方便的所在，伊無法度家己穿siat-tsuh，需要移工陪伴行動了後，就罕得出門。
約其量，規个家族內的人照伊的計劃行。囝兒的頭路大部分是伊鋪路的，收入穩定，而且和政治無交參。這展現出伊的控制力。一半擺仔，伊猶是會親身出面，來證明家己的價值，是親像嫁娶、社團餐會、遠親來訪這寡場面。某孫仔欲面試大學的時，伊執意欲坐高鐵上北，誰嘛閘伊袂牢，只好佇一爿共扶咧。或者是，某一个陽奉陰違的孫仔出新冊時，伊堅持欲參加發表會。
後來，伊所想起來的，大多數是早年的代誌。比論講過年時仔庄內的人會佇舊街擺桌耍四色牌天九牌、靠漢草佮日本同學相拍、選舉三バン。煞愈來愈少人了解其中的鋩角和意義。
像按呢的時陣，是愈來愈濟，尤其是伊目睭袂明，耳空變重了後。他坐佇坐欲一世人的藤椅頂，想起舊街鬧熱的人聲。人生敢親像八點檔？做戲悾，看戲戇。
佇一擺回診的路上，他坐佇車頂睏去矣。按呢嘛袂䆀，他無蹛院，嘛無受啥物痛苦。無的確，車頂咧放的，是伊上愛的歌。
嗚ゝ さんざめく 名も無き星たちよ
せめて鮮やかに その身を終われよ
我も行く 心の命ずるままに
我も行く さらば 昴 よ
啊 閃閃爍爍的 無名的天星唷
上無嘛愛顯目的 結束這世人
我嘛欲來行 綴著心內的聲
我嘛欲來行 再會啦 昴星啊
註：Âng Tiōng-Ong有真濟孫仔，文中所講並毋是仝一个人，我嘛可能毋是當事孫。毋過予伊懷疑有發育問題的彼个，無毋著，是我。
