是安慰，毋是麻痺
密西西比佮淡水河
會寫〈下淡水往事追憶〉，昭華老師嘛有受著Mark Twain 密西西比河上啟發。Mark Twain少年時做過引水人（pilot），佇無GPS的年代，船欲按怎駛，水是按怎流，就愛靠人引𤆬。昭華老師看了張友松翻譯的密西西比河上，翻頭轉來想，發覺語言的斷層真要緊。淡水河的紀錄，若毋是來台灣搵一下仔的官員寫的文言文，就是外國人所寫的，煞無咱人的觀點。社仔島捌有塗炭、淡水河行船人的生活，這寡物件煞無留落來
美術的淡水河
除了寫水文地理，昭華老師的畫作評論寫了誠好，有家己的看法。伊講起佇雄獅上班的時，一點一點揣資料，一條一條做索引，推薦逐家去看《台灣近代美術大事年表》。我看這陣網路頂閣買有。冊內底會寫木下靜涯，是有靈感。昭華老師家己嘛蹛淡水24冬，感受著的溼，木下的畫lìn看會著。原本閣想欲寫蔡秉乾，較無捷hőng提起的畫家。
寫作佮生活
寫作的時，昭華老師蓋注重生活。過啥款看生活，才有通寫啥物款的物件、做啥物款工課。有幾篇文章，昭華感覺家己重頭輕，經驗無夠分伻，就先硩落來。伊嘛希望寫出來的，是會當入去生活中的物件。昭華真欣羨日本有「晨間劇」，會當安慰，毋是麻痺，是伊心內真正的文藝。
台語文的音律
昭華寫台語文，是用心內音落去寫，追求口語佮書面中央的境界。錄音的時，才第一擺唸出來。台語的聲調有自然的音樂性，母語者唱台語歌，聽的人雖罔無看歌詞，嘛聽會出來。過去文化環境共文字看足重，平常時，昭華老師就會共話語、字詞囥佇心內，慢慢仔哺，沓沓仔聯想。咧寫詞寫詩的時，攏用會著。
台語敢是彼條頭鬃尾
落尾，有聽眾問台灣語言現狀的問題，實際上大部分少年囡仔袂曉台語，華台透濫佔多數。昭華老師回應，這馬的現象，是過去暴力的結果。伊按呢寫，是咧抵抗這款暴力。毋閣，昭華老師講起杜聰明，伊入去醫學院讀二年的，才共頭鬃尾剪掉。對彼時的人來講，in按呢做，有in的理想、氣節。台語敢會親像按呢，予一百冬後的人看起來，敢若是一場笑詼？
