自從遮有人影，自榕仔跤起好第一間草厝，我就佇咧矣。
我佇微微的風中，佇無眠無日向西的溪水。我佇尪架桌¹嘛佇墓龜²頂，佇塗礱間³嘛佇米絞⁴內。我無形體，嘛無固定的所在。遮的人叫我王爺公，嘛共我號做蘇府千歲。
遮毋是好生活的所在，風颱天做大水，洘旱的時田塗焦甲必開⁵。庄民過了今仔日，定定毋知明仔載佇佗位，in只好來向我下願。我只要目睭瞌瞌，就會聽著in的聲音，in的悲哀佮向望。
「王爺公，請你保庇阮兜阿仁gâu大漢，一切平安。」
「王爺公，這隻豬予我順順仔飼，大隻了後，我就刣來共你拜。」
「已經幾若日無雨水，粟仔攏欲焦去矣。王爺公，拜託這兩日仔落寡雨，通予我好過日。」
遮的人實在傷過散，番薯畚內底定定是空的，無法度起一間廟予我蹛。我的金身只有一个，欲管的代誌遐濟，管的所在遐闊，in只好共我輪流tshāi⁶佇無仝庄頭。雖罔我無鎮佇仝一搭，in攏共我tshāi佇心肝頭。
逐冬，時間若到，in會佇庄頭中央的街路口搭壇。in用車屏閘風，用布帆遮雨，共我囥佇頂頭。in請出上好的鑼鼓陣，刣上大隻的豬，規庄的人攏倚過來拜。佇這日，in全攏跪佇我面頭前等我鑒納，等到我允in象桮為止。
這款大拜拜原底一冬有兩擺。毋過，自某一年彼个人出來阻擋，就沓沓變賰一擺爾爾。
彼个人生做矮矮，人中留一劃喙鬚，講是遮的保正。大拜拜的日子，眾人攏沐著鬧熱的氣氛，干焦彼个人激一个面腔。伊見看著人咧拜拜，就走去共in的香案收起來。
誠實，我是袂計較這寡代誌，我不過是in創作出來的一个王爺公。
彼个人嘛是一个寫故事的人。伊共我寫入去內底。冊內底的人欲嫁娶的時，我恬恬佇邊仔咧看。冊嘛共我做生日鬧熱的情景寫入去，寫無閒咧點轎班的爐主，寫燒金的村民，寫刣豬的人大聲喝。伊雖然心肝內憢疑，我就按呢，顛倒活佇伊冊內底的世界矣。
有的人會問講，彼个人敢是專工佮我做對頭。戰爭過了，伊予人掠去新店的監牢，毋知影明仔日死活的日子當中，敢講攏毋捌向我祈禱過？
煞煞去！
足久足久以後，遮的人生活總算是較好過。有志之士共規个庄頭結合起來，收丁錢，起大廟。了後，我就毋是彼个無廟的王爺公矣。
— — 節錄自《一百年前，我們的冒險》〈在小說的土地上輪作 — — 蔡秋桐與他的語文嘗試〉
[1] 尪架桌：ang-kè-toh。祭桌。
[2] 墓龜：bōng/bōo-ku。墳頭。
[3] 塗礱間：thôo-lâng-king。脫穀殼的場所。
[4] 米絞：bí-ká。碾米機；精米廠。
[5] 必開：pit — khui。龜裂。
[6] tshāi：豎立。
